إزاي أحصل على تمويل علشان أنفذ فكرتي؟

articles Apr 11, 2022
موضوع التمويل ده معطل ناس كتير جدا إنها تبدأ بزنس.
 
وأنا اتكلمت فيه كتير بس المرة دي عاوز أتناول الموضوع من زاوية مختلفة شوية.
 
خلينا نفترض إن صاحب السؤال مجهز فكرته وعمل كل الدراسات وحدد إنه محتاج مليون جنيه علشان ينفذ الفكرة.
 
وخلينا نفترض إنه عمل خطة مالية بتقول إنه هيبدأ يحقق أرباح تتخطى المليون جنيه صافي ربح بعد السنة التالتة.
 
وخلينا نفترض برضه إن صاحب السؤال ساكن في شقة تمليك تمنها مليون جنيه وإنه راكب عربية تمنها نص مليون جنيه وعنده شوية فلوس في البنك محوشهم بقيمة نص مليون جنيه.
 
صاحب السؤال بيدور على تمويل علشان ينفذ فكرته، صح؟
 
وافترضنا إنه عارف محتاج كام بالظبط وعارف هيعمل إيه بالفلوس دي تحديدا (المضحك إن أغلب الناس اللي بيسألوا السؤال ده مابيبقوش عارفين)
 
طيب دلوقتي هو عنده فلوس في البنك وعنده عربية ممكن تجيب المبلغ ده.
 
ليه مابعش العربية وسحب الفلوس؟
 
أو ليه مابعش شقته وسكن في مكان إيجار لمدة ٣ سنين لحد ما يبدأ يحقق الأرباح المتوقعة بعد السنة التالتة زي ما مكتوب في الخطة؟
 
بالتأكيد مش هيعمل كدة لإنه خايف من المخاطرة بممتلكاته وتحويشة عمره.
 
إذا كنت إنت مش واثق مليون المية في فكرتك وهتعمل إيه بالظبط بالفلوس وهترجعها وتحقق أرباح إزاي، ليه بتفترض إن الممول مستغني عن فلوسه وهيغامر بيها في فكرة صاحبها نفسه خايف يغامر فيها!!
 
قولنا الكلام ده كتير …
 
إوعى تبدأ مشروع برأس مال كبير حتى لو معاك.
 
بلاش الأفكار الجامحة اللي عاوزة فلوس كتير لو دي أول تجربة ليك في البزنس.
 
لإنك محتاج تكتسب خبرة وتاخد السلم واحدة واحدة علشان تقلل من المخاطرة واحتمالات الفشل.
 
ابدأ بأصغر شكل لفكرتك أو غير الفكرة خالص المهم تكون في مجال إنت بتحبه وبتستمع فيه.
 
اتأكد من نجاح فكرتك الأول وابدأ حقق أرباح بشكل بسيط وكبر البزنس واحدة واحدة.
 
لما يكون عندك نموذج عمل ناجح ومربح، إنت نفسك هتتشجع وتحط فلوس وتستثمر في البزنس بتاعك ومش هتخاف …
 
والمستثمر كمان هو اللي هيجري وراك ويستثمر بسخاء لإنه شاف صاحب البزنس مؤمن بفكرته ونفذها بالفعل وحقق أرقام حقيقية على أرض الواقع مش مجرد تكهنات على ورق.
 
في النهاية الحياة علمتني إن اللي عاوز حاجة بيعملها!
 
لو عاوز تعرف أكتر عن إزاي تبدأ بزنس في مجال شغفك بأقل رأس مال ممكن، شوف الفيديو على الموقع

 

Close

50% Complete

Two Step

Lorem ipsum dolor sit amet, consectetur adipiscing elit, sed do eiusmod tempor incididunt ut labore et dolore magna aliqua.