إزاي أستفيد من العلم والخبرة اللي عندي في فكرة مشروع مميزة؟

articles Nov 09, 2021
السؤال ده جميل أوي 🙂
 
الأول هقولك مفاجأة …
 
وبعدين هقولك على الإجابة في سطر واحد من ٣ كلمات!
 
المفاجأة …
 
في البزنس "كم" العلم أو "كم" الخبرة مالوش أي قيمة.
 
العميل عمره ما بيشتري منك علشان إنت عالم أو خبير.
 
أمال العميل بيشتري من مين وليه؟
 
هنا نجاوب على السؤال…
 
"حل بيهم مشكلة"
 
أيا كان كم الخبرة أو العلم اللي عندك مالهومش أي قيمة في البزنس من غير ما تحل بيهم مشكلة بيعاني منها عميلك المستهدف.
 
إسأل نفسك … إزاي أوظف الخبرة والعلم اللي عندي في حل مشكلة بشكل مختلف.
 
سواء بتحل مشكلة ماحدش حاول يحلها قبل كدة أو ...
 
بتحل مشكلة بطريقة أفضل من الحلول الموجودة حاليا.
 
الفكرة كلها إنك إنت كرائد أعمال دورك إنك تحل المشكلة أو تقدم حل يسد رغبات وإحتياجات فئة معينة من الناس.
مش لازم إنت اللي يكون عندك كل العلم والخبرة…
 
تقدر تتعاون مع أصحاب العلم والخبرة وتوظفهم في فكرة مبتكرة إنت اللي رسمت صورتها
 
علشان كدة بقول دايما إنك في البزنس ليك دور من إتنين:
 
يا إما إنت المنتَج … بفتح التاء
 
أو المنتِج … بكسر التاء
 
لو إنت المنتَج يبقى إنت اللي لازم يكون عندك الخبرة والعلم الكافي لتقديم الحل
 
لو إنت المنتِج يبقى إنت دورك تستعين بخبرات الآخرين في تقديم الحل
 
مثال…
 
في شركة
Passion Point
 
أنا المنتَج
 
لإني بنقل خبرتي في ريادة الأعمال بشكل مباشر للناس من خلال البرامج اللي بنقدمها
 
في شركة
Chess Your Child
 
أنا المنتِج
 
لإني ماستنتش أكون مدرب شطرنج معتمد أو لاعب دولي علشان أعمل البزنس
 
ببساطة عملت شراكة مع أكبر جهة في العالم بتعلم شطرنج للأطفال وأصبح لينا الحق في استخدام مناهجهم في تعليم الشطرنج لأولادنا
 
وبعدين إستعنت بمدربين عندهم خبرة في التعامل مع الأطفال ودربناهم على منهج الشطرنج اللي صممناه
 
إحنا انهاردة بفضل الله أول وأكبر أكاديمية في مصر بتعلم الشطرنج للأطفال كوسيلة لتنمية وتطوير شخصيتهم
 
فالخلاصة …
 
علشان تستفيد من العلم والخبرة اللي عندك لازم توظفهم في تقديم حل مبتكر لمشكلة مُلحة عند فئة معينة من الناس.
 
اضغط هنا و شوف فيديو مجاني على الموقع عن إزاي تكتشف شغفك وتحوله لبزنس ناجح.
Close

50% Complete

Two Step

Lorem ipsum dolor sit amet, consectetur adipiscing elit, sed do eiusmod tempor incididunt ut labore et dolore magna aliqua.