هل الشغف بيأكل عيش؟

articles Jun 01, 2021

أظن الكل هيتفق إن أحلى حاجة في الدنيا إن الواحد يشتغل في الحاجة اللي بيحبها

 

ولكن بالنسبة للأمور المادية … هل فعلا الواحد ممكن يعمل بزنس في مجال شغفه ويحقق دخل يخليه يستغنى عن المرتب ويسيب الوظيفة

 

خصوصا لو إنت بتشتغل في شركة كبيرة ومرتبك كبير

 

علشان نجاوب على السؤال ده خلينا نتفق على بعض المسلمات

 

١. أي مجال في الدنيا لازم هتلاقي فيه حد بيكسب فلوس كويسة جدا وحد تاني البزنس بتاعه بيفشل ومش بيحقق أي مكاسب

 

وبالتالي الموضوع مش شغف بس

 

لازم تكون شاطر... وفاهم كويس إزاي شغفك ده يتعمل منه بزنس ناجح

 

٢. قبل ما تسيب وظيفتك، لازم تكون عملت بزنس بالفعل وبدأ ينجح … وبيكبر مع الوقت

 

الأسلوب ده أفضل كتير من إنك تسيب الوظيفة علشان لسة هتبدأ بزنس مش عارف أبعاده ونتايجه إيه

 

دي مغامرة مالهاش داعي ممكن تعرضك للفشل لا قدر الله

 

٣. ماتتوقعش إن البزنس الصغير اللي هتعمله جنب الشغل هيحقق ربح يساوي أو يزيد عن المرتب اللي بتقبضه حاليا بعد سنين خبرة في شركات كبيرة

 

لو ضغطت على نفسك وطلبت من البزنس بتاعك فوق طاقته … وعاوزه يحقق أرباح سريعة علشان تسيب الشغل … يبقى بتظلمه وبتظلم نفسك وأكيد هتاخد قرارات غلط وتضيع على نفسك فرصة إن البزنس بتاعك يكبر ويكون ممتع في نفس الوقت

 

لو متفق معايا على الأمور دي … خليني أقولك إمتى بالظبط تقدر تسيب الشغل وإنت مطمن

 

١. لازم تكون مدخر مبلغ يكفي مصاريفك و التزاماتك ٦ شهور على الأقل

 

٢. لازم يكون البزنس بتاعك بيحقق دخل ثابت أو متوقع كل شهر لفترة لا تقل عن ٦ شهور

 

وده مش هيحصل إلا لو بقى عندك نظام تسويق فعال بيجيبلك عدد العملاء اللي هتقدر تخدمهم … في حدود مقدرتك والوقت المتاح جنب الوظيفة.

 

مثال … ممكن الوقت اللي بتفرغه للبزنس بيسمح فقط بالشغل مع ٣ عملاء جدد كل شهر

 

فلو كل شهر لمدة ٦ شهور بيجيلك متوسط ٣ عملاء وكمان الطلب عليك بيزيد مع الوقت … بس إنت بترفض علشان معندكش مساحة … يبقى إنت كدة عندك نظام تسويق قوي وتبقى مطمن من نجاح مشروعك

 

٣. تعمل خطة مالية حسب وضعك والتزاماتك

 

يعني مثلا لو الـ ٣ عملاء اللي بيجولك كل شهر بيحققوا دخل يساوي ثلث مرتبك … يبقى إنت محتاج تحط خطة توسع علشان يجيلك ٩ عملاء كل شهر وبالتالي دخلك يوصل لمرتبك الحالي في خلال مدة زمنية معينة

 

وأثناء المدة دي ممكن تصرف من مدخراتك علشان تعوض الفرق

 

وده اللي أنا عملته بالظبط

 

كنت محوش مبلغ يكفي مصاريفي لمدة ٨ شهور … وسيبت الشغل والبزنس بتاعي بيدخل حوالي ٦٠٪ من المرتب

 

فضلت لمدة ٩ شهور تقريبا لغاية ما خطة التوسع للبزنس بتاعي استقرت وفي الأثناء دي كنت بعوض فرق الدخل من مدخراتي

 

في ناس تانية كان في خطتها المادية الدخل اللي بييجي من شهادات بنكية أو أصول عقارية وخلافه

 

المهم يبقى عندك تصور مبدأي لاستقرار وضعك المادي

 

لإن أخطر شئ إنك تشتغل في البزنس بتاعك تحت ضغط مادي

 

هتاخد قرارات غلط وتقبل شغل مش حابه لمجرد احتياجك للفلوس ... وبالتالي هتفقد الشغف مع الوقت وتخسر الميزة الكبيرة اللي علشانها بدأت رحلتك

 

قبل ما آخد قرار الإستقالة قعدت مع نفسي وسألت سؤال

 

هل بعد سنتين من انهاردة مرتبي هيزيد بالمعدل اللي هيسمحلي أدخل بنتي … وإخواتها فيما بعد إن شاء الله ... مدرسة بالمستوى اللي بتمناه ليهم؟

 

"كانت الإجابة: "قطعا لأ

 

فكان لازم أتحرك وآخد الخطوة بدون أي تأجيل … علشان البزنس الخاص هو الحاجة الوحيدة اللي ممكن تتحكم فيها بمستوى دخلك وتزوده بمعدلات كبيرة في فترات قصيرة … وده طبعا متوقف على القيمة اللي بتقدمها للناس

 

وبالتأكيد لما تكون بتعمل اللي إنت بتحبه هتبدع وتقدم قيمة مميزة جدا الناس هتقدرها وتدفعلك مقابلها فلوس كويسة جدا

 

خلاصة الموضوع، الشغف مش بس بيأكل عيش

 

الشغف هيخلي كل جوانب حياتك مزدهرة وثرية … سواء بالمتعة أو بالخبرات أو بالفلوس

 

إحنا في 

Passion Point

بنأكد دايما على أهمية إرتباط الشغف بالربح

 

لإن لو شغفك مش بيأكل عيش مش هتقدر تستمر فيه

 

زحمة المسؤوليات والشغل هتاخد دايما من الوقت اللي بتخصصه لممارسة شغفك … لو هو مجرد هواية بتمارسها في وقت الفراغ

 

لكن لما شغفك يبقى هو شغلك الأساسي ومصدر دخلك … هتقدر تمارسه وتتطور فيه وتكبره … وده هيزود من إستمتاعك كل يوم باللي إنت بتعمله

 

بس الموضوع محتاج صبر وتخطيط سليم وإيمان كبير جدا بحلمك … لإن البزنس اللي بيحركه الشغف بيكون صاحبه عنده رسالة ورؤية أكبر بكتير من الربح فقط

 

كل قصص النجاح اللي خرجت من عندنا كانت عارفة إن الربح مهم بكل تأكيد ... ولكن كان المحرك الأساسي عندهم هو الإستمتاع بشغلهم وتقديم قيمة تكون مصدر خير ونفع للناس

 

لو ده حصل الربح هييجي بسهولة كنتيجة أكيدة لسعيك المستمر

 

في النهاية بدعوك للإشتراك في 

Free Webinar

هتكلم فيه عن إزاي تحول شغفك لبزنس ناجح بمنتهى السهولة والأمان

 

اضغط هنا للتسجيل الآن

Close

50% Complete

Two Step

Lorem ipsum dolor sit amet, consectetur adipiscing elit, sed do eiusmod tempor incididunt ut labore et dolore magna aliqua.